Spektakël në qiellin e Dragashit: Këtë fundjavë mbahet gara e sporteve ajrore “HIZI KUP 2026” në Brezne

Drejtoria për Kulturë, Rini dhe Sport (DKRS) në Dragash, në bashkëpunim me “Aeroklub Prishtina”, ka njoftuar organizimin e aktivitetit të veçantë sportiv “HIZI KUP 2026”. Ky event, i cili i dedikohet sporteve ajrore, do të zhvillohet këtë fundjavë, më 17 dhe 18 tetor, në lokacionin piktoresk të Liqenit të Breznës.

Qëllimi kryesor i këtij organizimi është promovimi i sportit, nxitja e aktiviteteve rekreative dhe zhvillimi e mbështetja e sporteve ajrore në rajonin tonë. Institucionet ftojnë të gjithë qytetarët dhe të apasionuarit pas adrenalinës që të jenë të pranishëm për të ndjekur nga afër këtë garë atraktive.

Për shkak të kushteve të favorshme atmosferike që kërkojnë këto sporte, fluturimet do të zhvillohen kryesisht në orët e para të mëngjesit. Agjenda e plotë e garës është si më poshtë:

E shtunë, 17 tetor (Dita e parë zyrtare e garës)

• 07:00 – 07:30 | Takim me pilotët dhe informimi (briefing)

• 07:30 | Nisja për në pikën e fluturimit (takeoff)

• 08:00 | Fillimi i raundit të parë

• 11:00 | Pauzë (Pas orës 12:30 nuk do të ketë fluturime)

E diel, 18 tetor (Dita e dytë zyrtare e garës)

• 07:30 | Nisja për në pikën e fluturimit (takeoff)

• 08:00 | Fillimi i raundit

• 11:00 | Pauzë (Pas orës 12:30 nuk do të ketë fluturime)

• 14:00 | Ceremonia e ndarjes së shpërblimeve për fituesit

Të gjithë qytetarët janë të mirëseardhur për të shijuar këtë ngjarje të rrallë sportive në natyrën e bukur të Dragashit.

©TVOPOJA