Në Dragash më 5 Maj, u shënua Dita e Dëshmorëve me një akademi solemne të organizuar nga Organizata e Veteranëve të Luftës së UÇK-së dhe Komuna e Dragashit. Ky manifestim përkujtimor u mbajt për të nderuar dhe kujtuar sakrificën e dëshmorëve që dhanë jetën për lirinë e vendit.
Në sallën ku u mbajt akademia, ishin të pranishëm prindër dhe familjarë krenarë të dëshmorëve, si dhe veteranë të Ushtrisë Çlirimtare të Kosovës, të cilët u nderuan me mirenjohje për kontributin dhe guximin e tyre.
Mirënjohje iu dhanë familjeve të dëshmorëve, veteraneve femra që morën pjesë në UÇK dhe mirënjohje pas vdekjes për veteranët që nuk janë më mes nesh.
Ky event vjen si një kujtesë e fortë për të gjithë qytetarët e Kosovës për të vlerësuar dhe ruajtur lirinë e fituar me çmim të lartë, dhe për të vazhduar të ndërtojnë një të ardhme të denjë për brezat që do të vijnë. Dita e Dëshmorëve të Kosovës mbetet një simbol i përhershëm i kurajos dhe vendosmërisë për të mbrojtur vlerat dhe ideale të atdheut.
Në një fjalim të mbajtur gjatë akademisë solemne në Dragash, kryetari i komunës dhe kryetari i Organizatës së Veteranëve të Luftës së UÇK-së theksuan rëndësinë e sakrificës së tyre dhe kontributin e palëkundur ndaj lirisë së Kosovës. Po ashtu, përfaqësuesi nga komunitetet në Dragash u shpreh me respekt dhe mirënjohje për dëshmorët dhe rolin e tyre në ndërtimin e një të ardhmeje më të mirë për të gjithë.
Pas përfundimit të akademisë, pjesëmarrësit vazhduan me homazhe në varrezat e dëshmorëve, ku u bënë nderime dhe u vendosën kurora lulesh si shenjë respekti dhe kujtimi për ata që dhanë jetën për vendin. Kjo ceremoni simbolizon lidhjen e thellë mes të kaluarës heroike dhe aspiratave për një të ardhme të paqes dhe prosperitetit, duke ruajtur kujtimin e dëshmorëve si një dritë udhërrëfyese për brezat që do të vijnë.
©TVOPOJA
