“BRESANA E BASHKUAR” rikthehet fuqishëm: 24 ekipe, spektakël dhe sonte finalja e madhe!

Pas disa vitesh pauzë, turneu tradicional “Bresana e Bashkuar” është rikthyer në mënyrën më të mirë të mundshme, duke u shndërruar në një prej ngjarjeve më të mirëpritura sportive të këtyre ditëve në Komunën e Dragashit.

Rikthimi i turneut ka sjellë një interesim jashtëzakonisht të madh nga qytetarët, me 24 ekipe të regjistruara, ndërsa gjatë ditëve të zhvillimit nuk kanë munguar ndeshjet emocionuese, golat dhe futbolli cilësor.

Në dy netët e fundit, Salla e Sportit në Bresanë është mbushur me një numër të madh shikuesish, të cilët kanë ndjekur nga afër përballjet dhe kanë krijuar një atmosferë të veçantë sportive. Interesimi i madh i publikut ka dëshmuar edhe një herë se futbolli vazhdon të jetë një prej aktiviteteve që më së shumti bashkon qytetarët e kësaj treve.

Pas ndeshjeve çerekfinale, të cilat dhuruan shumë gola dhe spektakël, gjithçka është gati për natën finale të turneut “Bresana e Bashkuar”.

Sonte përcaktohen finalistët dhe kampioni!

Gjysmëfinalja 1 – 20:30
Big Bresana – Bellobradi JR

Gjysmëfinalja 2 – 21:00
Market Çlirimi – Bresana

FINALJA E MADHE – 22:00

Në këtë rikthim të turneut, edhe TV Opoja është krenar për rolin e saj si mbështetëse e “Bresana e Bashkuar”. TV Opoja ka qenë sponsor dhe përkrahës i këtij turneu që nga fillimet e tij dhe vazhdon ta mbështesë atë edhe sot, në forma të ndryshme, duke kontribuar në promovimin dhe pasqyrimin e këtij aktiviteti sportiv.

Organizimi i edicionit të sivjetmë është bërë nga rinia e fshatit Bresanë, në bashkëpunim me kryesinë e fshatit, ndërsa një kontribut të rëndësishëm në realizimin e turneut kanë dhënë edhe shumë banorë të Bresanës, të cilët e kanë mbështetur financiarisht organizimin.

Ky bashkëpunim është dëshmi se kur rinia, komuniteti dhe strukturat e fshatit bashkohen rreth një qëllimi të përbashkët, mund të krijohen aktivitete që sjellin sport, argëtim dhe bashkim për të gjithë.

Pas disa vitesh mungesë, “Bresana e Bashkuar” është rikthyer fuqishëm: 24 ekipe, shumë futboll, emocione, spektakël dhe një publik i jashtëzakonshëm.