Ministri i Shëndetësisë (MSH), Armend Zemaj në një intervistë ka folur për situatën me COVID-19, funksionimin e sistemit arsimor gjatë pandemisë, ristrukturimin e Qendrës Klinike Universitare të Kosovës (QKUK) dhe çështjen e sigurimeve shëndetësore.

Ministri Zemaj tregoi se gjendja në Kosovë me COVID-19, në shtatë muajt e kaluar ishte e vështirë por siç tha ai aktualisht situata është e qetë dhe nën kontroll.

Ai tha se edhe pse situata është e qetë masat e rekomanduara nga Instituti Kombëtarë i Shëndetësisë Publike të Kosovës (IKShPK) dhe Ministria e Shëndetësisë (MSH), duhet të respektohen.

“Shtatë muaj të vështirë. Trajtim të një virusi të panjohur. Shtatë muaj virus i panjohur që e ka përfshirë mbarë globin. Fatkeqësisht dhe Kosova nuk ishte imune ndaj kësaj. Tre muaj izolim, tre muaj duke jetuar me virusin por duke jetuar jetën, duke u mundësuar pjesa e zhvillimit ekonomik dhe shoqëror në kapacitetet e mbikëqyrjes dhe realizimit të masave. Fatkeqësisht qershori ishte diçka e re për ne. MSH-ja e gjeti një hapje të pakontrolluar. Korriku ishte i vështirë, në fund të korrikut morëm masat dhe e ngritëm dinamikën e zbatimit të tyre. Gushti ishte i stërngarkuar dhe fillimi i shtatorit na gjeti në një situatë tjetër. Tash relativisht e kemi një situatë të qetë pandemike dhe pothuajse numri ka shkuar duke rënë, qoftë i të infektuarve dhe të atyre që e pësojnë më fatalitet. Aktualisht gjendja është stabile, po kërkojmë që kjo vigjilencë dhe dinamikë të përcillet. Masat duhet të respektohen dhe kjo është situata”, ka thënë Zemaj.

Ministri Zemaj ka folur edhe për funksionimin e sistemit arsimor në kohë pandemie. Ai tha se përgatitja për fillimin e vitit shkollor ishte e përbashkët me MSH-së, MASH-in dhe Qeverinë.

Ai theksoi se janë hartuar udhëzuesit, protokollet, si dhe është duke u mbikëqyrur mësimi nëpër shkolla.

Fatmirësisht sipas tij, e gjithë përgatitja e ndërmarr para fillimit të vitit shkollor është duke dhënë rezultate pozitive.

“Rekomandimet po përcillen çdo ditë nga IKSHPK-ja. Testimi i mësimdhënësve paraprak, testimi i cili po vazhdon aty ku po hulumtohet se mund të ketë raste të shpërndarjes së infeksionit. Fatmirësisht ky dy javor është duke na çuar në një rezultat pozitiv. Kjo është puna e mësimdhënësve, kjo është puna e prindërve e nxënësve e të gjithë neve që ta ruajmë dhe ta zhvillojmë”, tha ministri Zemaj, për telegrafin.

Ai u shpreh se edhe pse përgatitjet janë në nivel, në disa shkolla është detyruar të marr masa, pasi siç tha ai ka raste me COVID-19.

“Edhe pse ju e dini që është me orare të përgjysmuar, ku më është dashur të marr disa masa që disa shkolla të kalojnë në nivelin A të mësimit në nivelin C, për shkak të disa rasteve që kanë rezultuar me COVID-19. Nëse shkojmë me këtë dinamik dhe më këtë kujdes ne mund të ecim tutje. Në momentin që del infeksioni jam i detyruar sipas ligjit që të marr masa. Kjo është arsyeja pse kalon nga një sistem në sistemin tjetër”, tha tutje ai.

Kjo qetësi sipas ministrit është duke i dhënë mundësinë që planet dhe strategjitë e tyre t’i përgatisin në mënyrë të shpejtë për fazën tjetër, të vjeshtës dhe dimrit për parandalimin e infektimit me COVID-19.

“Faza e vjeshtës dhe dimrit të na zë shumë më të përgatitur, në ngritjen e infrastrukturës, kapaciteteve humane, testimit, vaksinimit, e shumë gjërave të tjera që mund të ndihmojnë në ruajtjen e shëndetit të qytetarëve tanë”, tha ndër të tjera ministri Zemaj.