Rexhep Shyqeriu ishte mësuesi i parë nga fshati Bresanë i komunës së Dragashit sipas një shkrimi të publikuar nga Kasam Muhameti e përcjell televizioni Opoja.

Ne si redaksi ju ofrojmë ketë biografi të Mësuesit të parë nga fshati Bresanë:

Rexhep Shyqeriu (1925 – 1990)‘mësuesi i parë nga Bresana’

Mësuesi, Rexhep Shyqeriu, u lind më 1925 në Bresanë. Shkollën fillore e mbaroi në vendlindje, ndërsa shkollimin e më tutjeshëm të asaj kohe, trajnimet dhe kurset për mësuesi i mbaroi në Prizren. Sipas rrëfimeve të të afërmve të tij, babai i mësuesit Rexhep – Shyqeriu, ishte dashamirës i dijes, meqë edhe vetë ai ishte i ditur, prandaj kishte vendosur që djalin e tij – Rexhepin ta shkollojë dhe ta bëjë mësues.

Në bazë të informacioneve që kemi siguruar, mësuesi Rexhep punën si mësimdhënës (në gjuhën shqipe – mësues për vitet 1 – 4 fillore) e kishte filluar më 1950, i cili kishte punuar në disa fshatra të Opojës. Sipas informacioneve që na ka ofruar profesori Naim Ramadani nga Brruti, mësuesi Rexhep ka punuar në Brrut gjatë viteve 1961/62 dhe 1962/63. Ai ka punuar edhe në Zaplluxhe, kurse për këtë na ka rrëfyer Dr. Ajni Sinani nga Zaplluxhja, i cili e ka cituar vitin 1969. Gjithashtu ai ka punuar edhe në Blaç. Ndërsa, deri në fund të jetës së tij (pensionim – 1990), ka punuar në vendlindjen e tij – në Bresanë.


P.S.
Koha në të cilën jetoi e veproi mësuesi Rexhep Shyqeriu – në ish-Jugosllavi, ishte tejet e vështirë. Siç dihet në vitet e 1930-ta dhe të 1940-ta ndodhi Lufta e Dytë Botërore.
Para kësaj lufte, kishte arsimim në Bresanë, por të një natyre tjetër dhe me alfabet osman, duke pasur parasysh mësimin në mejtep të xhamisë, i cili fillet e veta i ka nga vite shumë të hershme, që nga koha e Mehmet Kukli Beut, pra pas vitit 1500. Pastaj, gjatë viteve 1908 – 1949 funksionoi edhe Medreseja e Mesme e Bresanës, nën udhëheqjen e muderris Rexhep Ismailit nga Bresana (1871 – 1956), ndonëse mësimet përktheheshin në gjuhën shqipe. Kurse në mejtep për mësimdhënie qenë të angazhuar: mulla Abdi Xheladini nga Kuklibegu (i njohur në popull si “Avdi Begi”, të cilin së bashku me disa të tjerë e vranë serbët më 1912 te ‘Livadhi i Kasës’). I njohur për mësimdhënie ishte edhe mulla Mehmet Salihu (1898 – 1985), madje ai ka shkruar shkrime të shumta që kanë përmbajtje fetare, me alfabet osman. Kështu që ai sot njihet si “Bejtexhiu i Opojës”.

Gjithashtu, gjatë një periudhe kohore, arsimimi katër vjeçar në Bresanë (para vitit 1950) është bërë në gjuhën serbo-kroate. Mësimdhënës të angazhuar ishin: maqedonë, serbë, malazezë…, të cilët edhe banonin në Bresanë. Më pastaj, qenë të angazhuar edhe disa mësuesë shqiptarë nga vende të tjera – jo nga Opoja, derisa kryen shkollimin për mësimdhënie disa nga banorët vendës.