Bedri Halimi shpallet i pafajshëm për rastin “Brezovica”

Ish-Kryeinspektori i Ministrisë së Mjedisit dhe Planifikimit Hapësinor (MMPH), Bedri Halimi, është shpallur i pafajshëm nga Gjykata Themelore për Krime të Rënda në Pejë, lidhur me akuzat që rëndonin mbi të në procesin e njohur gjyqësor si rasti “Brezovica”.

Njoftimin për lirimin nga këto akuza e ka bërë të ditur vetë Halimi përmes një postimi në llogarinë e tij në rrjetin social ‘Facebook’. Sipas tij, vendimi lirues është marrë në mënyrë unanime nga trupi gjykues i gjykatës në Pejë, duke e shpallur të pafajshëm për të gjitha pikat e aktakuzës.

Aktakuza ndaj Halimit ishte ngritur nga Prokuroria Themelore në Ferizaj, e cila e ngarkonte atë me veprën penale të keqpërdorimit të detyrës zyrtare përgjatë angazhimit të tij si kryeinspektor.

Duke komentuar epilogun e këtij procesi, Halimi theksoi se vendimi i gjykatës dëshmon rëndësinë e provave përballë pretendimeve të pabazuara.

“Kur akuza nga policët hetues dhe prokurori ndërtohet pa fakte, përballet me prova, e fjalën e fundit e thotë Gjykata”, ka shkruar ai në njoftimin e tij drejtuar opinionit publik.

Me këtë vendim, mbyllet një proces i gjatë përballjeje me drejtësinë për ish-zyrtarin e lartë të MMPH-së, duke hedhur poshtë pretendimet e organit të akuzës për përfshirjen e tij në keqpërdorime në zonën e Brezovicës.

©TVOPOJA