Resul Sinani, një nga fytyrat më të njohura televizive, i ka rënë pishman që ka hyrë në politikë – raporton Tv Opoja.

Në një publikim në rrjetin social “Facebook” ai ka njoftuar se është larguar nga Nisma Socialdemokrate.

Sinani mes të tjerash tregoj edhe arsyen se përse kishte marrë vendim që të largohet nga ky subjekt politik por jo nga politika .
Ai thotë se në këtë parti kam aderuar për një ndryshim në skenën politike por që për fat të keq nuk kam mundur ta gjejë vetë që prej kohës kur kam aderuar në këtë parti politike ku mes të tjerash konstaton se ” Ujku qimën e ndërron por zanatin se harron ” transmeton Tv Opoja.

Po ju përcjellim shkrimin e Resul Sinani

Isha në trenin e gabuar

Gjatë këtyre ditëve, kam pranuar shumë pyetje, nga miq që i njoh personalisht, nga shumë dashamirë që nuk i njoh personalisht, por edhe nga gazetarë, lidhur me vendimin tim për t’u larguar nga Partia Nisma Socialdemokrate e Kosovës.
Më lejoni që në fillim t’ju falënderoj të gjithëve për mirëkuptimin tuaj dhe mbështetjen tuaj për t’u angazhuar në politikë dhe në Partinë Nisma Socialdemokrate, e gjithashtu edhe për mbështetjen dhe përkrahjen tuaj që më keni dhënë këto ditë për largimin tim prej aty. Nëse unë ju kam befasuar me vendimin tim për t’u angazhuar në parti, ju më keni befasuar me përkrahjen e vendimit tim për t’u larguar prej saj, që dorën në zemër, është shumë herë më e madhe se sa kur kam aderuar!

Nuk dua të merrem me të kaluarën dhe nuk do të merrem, sepse e rëndësishme është e ardhmja. Mirëpo, ndjehem i obliguar ndaj të afërmve dhe opinionit të gjerë të sqaroj vendimin tim të fundit. Sado që mund të jetë dukur i papritur apo i nxituar, nuk është fare i tillë, madje mund të them se kam pritur gjatë, që nga shtatori i vitit të kaluar. Për t’u angazhuar në politikë, unë së pari kam pasur IDENË, për realizimin e së cilës, kam krijuar BESIMIN dhe pastaj jam bërë pjesë e saj. Këtë besim e kam krijuar pas bisedave të drejtpërdrejta me liderin e NSD, prandaj edhe kam marrë vendimin për aderim aty. Mirëpo, që ideja të realizohej duheshin disa veprime konkrete të cilat nuk ndodhën kurrë. Përkundrazi, veprimet shkonin në drejtim të kundërt. Nuk u dashtë shumë kohë që të kuptoja se isha në trenin e gabuar. Muajt në vijim, ma forcuan këtë bindje dhe shumë natyrshëm, vendosa të zbres nga ai tren i cili nuk po shkonte në drejtimin e duhur.

Gjatë këtij viti të angazhimit tim në politikë, megjithatë IDEJA për të hyrë në politikë nuk është shuar tek unë, përkundrazi, është forcuar dhe është formësuar. Sot, pavarësisht se a do të jem pjesë e ndonjë subjekti politik apo jo, unë rreshtohem fort dhe i bindur krah atyre që mendojnë se Kosovës i duhet NDRYSHIMI i skenës politike! Çdo ditë që po kalon, ky ndryshim po bëhet më i nevojshëm dhe më i domosdoshëm, por ai mund të ndodh vetëm përmes votës. Kur them ndryshim, e kam fjalën për ndryshim të vërtetë të skenës politike e jo të tilla si deri më tani për të cilat në fund kemi mbërritur në konstatimin se “Ujku qimen e ndërron, por zanatin s’e harron”.