Policia e Kosovës ka njoftuar se sot po zhvillojnë një aksion në rajonin e Ferizajt kundër përdorimit të telefonit gjatë drejtimit të automjetit.
Sipas policisë ky aksion është duke u zhvilluar në bashkëpunim mes policëve me rroba civile nga Njësia Rajonale të Komunikacionit Rrugor dhe policëve në uniformë nga stacioni policor i Ferizajt.
“Sot, nga ora 10:00 Policia Rajonale e Ferizajt ka nisur një aksion i koduar ‘Përdorimi i telefonit gjatë drejtimit të automjetit’. Ky aksion, ndryshe nga aksionet tjera po realizohet në bashkëpunim të policisë me rroba civile nga Njësia Rajonale e Komunikacionit Rrugor dhe policisë me uniformë nga stacioni policor i Ferizajt. Një patrullë e policisë me rroba civile, në lokacione të ndryshme identifikon shoferët të cilët shkaktojnë kundërvajtje të ndryshme në komunikacion, me theks të veçantë, duke e përdorur telefonin gjatë drejtimit të automjetit dhe lajmëron patrullën policore e cila është me uniformë. Pas identifikimit të kundërvajtësit, i njëjti ndalohet nga policia me uniformë dhe i shqiptohet gjoba kundërvajtëse, sipas ligjit të komunikacionit rrugor”, njofton policia.
Ky aksion sipas policisë do të vazhdojë edhe në ditët ne vijim në mënyrë që të parandalohen aksidentet.
“Ky aksion do të vazhdojë edhe në ditët në vijim dhe ka synimin që të parandalohen aksidentet në komunikacionin rrugor, ngaqë kundërvajtjet e tilla shpeshherë kanë shkaktuar edhe aksidente”, bën të ditur policia./Telegrafi/