PDK Dragash zyrtarizon kandidatin për kryetar të komunës në zgjedhjet lokale të 2025-ës

Sot, dega e Partisë Demokratike të Kosovës (PDK) në Dragash mbajti mbledhjen e rregullt, në të cilën fokusi kryesor ishte përgatitja për zgjedhjet lokale që pritet të mbahen më 12 tetor 2025.

Pas diskutimeve të frytshme dhe në një atmosferë bashkëpunuese, strukturat e degës vendosën njëzëri të nominojnë z. Shaban Shabani si kandidat për kryetar të Komunës së Dragashit. Ky vendim reflekton jo vetëm unitetin e brendshëm të degës, por edhe besimin e palëkundur ndaj z. Shabani, si një figurë e dëshmuar për profesionalizëm, përkushtim dhe vizion për zhvillimin e komunës.

Z. Shaban Shabani ka një karrierë të gjatë në shërbim të qytetarëve të Dragashit, dhe mbështetja unanime për kandidaturën e tij vjen si rezultat i angazhimit të tij të vazhdueshëm në zgjidhjen e problemeve lokale dhe promovimin e interesave të komunitetit.

PDK Dragash u bën thirrje të gjithë anëtarëve, simpatizantëve dhe qytetarëve që të jenë pjesë aktive e procesit zgjedhor dhe të mbështesin këtë kandidaturë që synon të sjellë një qeverisje efikase, të drejtë dhe zhvillimore për komunën tonë.