QKMF në Dragash fillon vizitat sistematike shëndetësore nëpër shkolla

Nën organizimin e Qendrës Kryesore të Mjekësisë Familjare “Adem Berisha” në Dragash, kanë nisur vizitat sistematike shëndetësore në shkollat fillore të komunës, me fokus tek nxënësit e klasës së parë dhe të pestë. Lajmi është bërë i ditur përmes faqes zyrtare të QKMF-së në Facebook, ku theksohet rëndësia e këtij projekti për parandalimin e hershëm të problemeve shëndetësore.

Ekipet mjekësore të përbëra nga mjekë, stomatologë dhe infermierë janë të angazhuar në këtë proces, duke realizuar kontrolle të përgjithshme mjekësore dhe duke dhënë këshilla për një mënyrë jetese të shëndetshme që në moshë të vogël, raporton Televizioni Opoja. Këto vizita përfshijnë monitorimin e rritjes, shëndetit oral, dëgjimit, shikimit, si dhe faktorë të tjerë të rëndësishëm për zhvillimin e nxënësve.

QKMF “Adem Berisha” bën të ditur se qëllimi i këtij projekti është edukimi i hershëm shëndetësor, zbulimi i hershëm i sëmundjeve dhe ndihma në orientimin e trajtimit të duhur për secilin rast që kërkon vëmendje mjekësore.

Një falënderim i veçantë u është drejtuar personelit arsimor dhe prindërve për bashkëpunimin e tyre në realizimin e suksesshëm të kësaj iniciative.

Ky projekt përbën një hap konkret drejt përmirësimit të shëndetit publik në nivel lokal dhe reflekton përkushtimin institucional për një brez të shëndetshëm dhe të informuar që nga fëmijëria.

©TVOPOJA