Ta duam Dragashin duke e jetuar atë, zhvillimi fillon nga zgjedhjet tona!

Çdo verë, me ardhjen e mërgatës, Komuna e Dragashit merr një gjallëri të veçantë. Rrugët mbushen me njerëz, lokalet dhe restorantet frekuentohen më shumë, ndërsa aktivitetet kulturore e sportive i japin komunës një atmosferë ndryshe. Megjithatë, edhe në këtë periudhë vihet re një fenomen që përsëritet nga viti në vit: shumë të rinj zgjedhin ta kalojnë kohën e lirë në qytete të tjera edhe pse Dragashi ofron gjithnjë e më shumë mundësi për argëtim, rekreacion dhe socializim.

Së fundmi, këtë çështje e ngriti edhe aktivisti, fotografi dhe dashamirësi i natyrës, Jeton Qengaj, i cili u bëri thirrje bashkëqytetarëve që të mbështesin bizneset vendore dhe të shpenzojnë më shumë në komunën e tyre. Mesazhi i tij ishte i thjeshtë, por me peshë: çdo euro e shpenzuar në Dragash forcon ekonominë lokale, ndihmon bizneset vendore dhe krijon mundësi të reja për punësim e zhvillim.

Ky reagim nuk duhet parë vetëm si një ftesë për të konsumuar në bizneset lokale. Ai është një thirrje për vetëdijesim qytetar. Zhvillimi i një komune nuk varet vetëm nga investimet publike apo private, por edhe nga zgjedhjet që bëjnë vetë qytetarët çdo ditë. Kur zgjedhim të pimë një kafe, të hamë një drekë apo të organizojmë një aktivitet në Dragash, ne në fakt investojmë në ekonominë e vendit tonë.

Nga ana tjetër, është e rëndësishme të pranohet edhe fakti se Komuna e Dragashit, institucionet lokale, klubet sportive dhe organizatat e shoqërisë civile kanë bërë përpjekje të konsiderueshme për ta pasuruar jetën publike gjatë verës.

Një nga ngjarjet më të rëndësishme që organizohet nën patronatin e Kryetarit të Komunës është Festivali Ballkanik “Opoja Vallëzon”, i cili për tri net me radhë sjell në Bresanë ansamble nga vende të ndryshme të Ballkanit dhe Evropës, duke promovuar kulturën, traditën dhe turizmin lokal. Po ashtu, turneu tradicional i futbollit, me pjesëmarrjen e ekipeve nga të gjitha fshatrat e komunës, vazhdon të jetë një nga aktivitetet sportive më të ndjekura të verës, duke mbledhur çdo mbrëmje një numër të madh sportdashësish.

Kalendari veror përfshin gjithashtu Ditët e Diasporës, të organizuara për komunitetin shumicë dhe komunitetet joshumicë, turneun e shahut, si dhe aktivitete të tjera kulturore, sportive dhe rekreative që e bëjnë verën në Dragash më aktive se në shumë vite më parë.

Një rol të rëndësishëm luan edhe shoqëria civile. Organizata AVOKO, përmes kampingjeve dhe aktiviteteve në bjeshkët e Sharrit, ka krijuar ura bashkëpunimi mes të rinjve të komunës dhe bashkëmoshatarëve të tyre nga diaspora, duke promovuar natyrën, miqësinë dhe turizmin malor një potencial që pak komuna në Kosovë e kanë.

Të gjitha këto dëshmojnë se në Dragash ka lëvizje, ka organizime dhe ka njerëz që punojnë për ta bërë jetën publike më të pasur. Megjithatë, sfida mbetet që këto aktivitete të mbështeten edhe më shumë nga vetë qytetarët, veçanërisht nga të rinjtë.

Shpesh dëgjojmë ankesa se në Dragash “nuk ka çfarë të bëhet”. Por, a kemi marrë pjesë në aktivitetet që organizohen? A i kemi mbështetur festivalet, turnetë sportive, kampingjet, koncertet apo iniciativat qytetare? Apo kemi zgjedhur automatikisht të kërkojmë argëtim diku tjetër?

Sigurisht, gjithmonë ka hapësirë për më shumë. Organizimi i kinemave verore në ambient të hapur, ecjeve të organizuara në natyrë, ekspozitave artistike, aktiviteteve teknologjike për rininë apo panaireve artizanale do ta pasuronin edhe më tej kalendarin veror. Çdo ide e re është e mirëpritur dhe çdo iniciativë që i afron të rinjtë me vendlindjen është një investim për të ardhmen.

Por po aq e rëndësishme është edhe mbështetja që qytetarët u japin këtyre iniciativave. Një aktivitet nuk bëhet i suksesshëm vetëm sepse organizohet, por sepse njerëzit marrin pjesë në të. Një biznes lokal nuk zhvillohet vetëm sepse hap dyert, por sepse qytetarët zgjedhin ta mbështesin.

Dragashi është një komunë me natyrë të jashtëzakonshme, me traditë, kulturë, gastronomi dhe njerëz mikpritës. Është një vend që ka potencial të madh turistik dhe ekonomik. Ky potencial nuk zhvillohet vetëm nga institucionet, por edhe nga secili prej nesh.

Le të jemi kritikë kur ka nevojë, por edhe mbështetës kur bëhen gjëra të mira. Le të propozojmë ide të reja, të marrim pjesë në organizime dhe t’i mbështesim ato. Le ta zgjedhim Dragashin jo vetëm si vendin ku kemi lindur, por si vendin ku duam të jetojmë, të kalojmë kohën e lirë dhe të ndërtojmë të ardhmen.

Në fund, zhvillimi nuk fillon nga projektet e mëdha. Ai fillon nga vendimet e vogla të secilit prej nesh: të pimë një kafe në lokalin e lagjes, të marrim pjesë në festivalin e komunës sonë, të ndjekim një ndeshje futbolli, të vizitojmë bjeshkët tona, të mbështesim një biznes lokal dhe të jemi pjesë e jetës së komunitetit.

Sepse një Dragash më i zhvilluar nuk ndërtohet vetëm nga institucionet. Ai ndërtohet nga qytetarët që besojnë te vendi i tyre dhe zgjedhin ta mbështesin atë çdo ditë.

©TVOPOJA