Bajram Begaj është zgjedhur president i ri i Shqipërisë. Begaj, që deri sot ishte shef i Shtabit të Përgjithshëm të Forcave të Armatosura Shqiptare, ka marrë 78 vota pro në votimin e fshehtë në Kuvendin e Shqipërisë. Katër vota ishin kundër dhe një ishte abstenim.

Emri i Begajt ishte propozuar nga Partia Socialiste e kryeministrit Edi Rama.

Presidenti i ri u zgjodh në raundin e katërt të procesit për zgjedhjen e presidentit.

Në votim nuk mori pjesë një pjesë e opozitës që e quajti shkelje kushtetuese emërimin e një ushtaraku aktiv në postin e presidentit.

Begaj është pasues i Ilir Metës që detyrën do ta dorëzojë më 24 korrik.

Begaj ka lindur më 20 mars 1967, në Rrogozhinë. Ka të përfunduara studimet në Mjekësi, ndërsa në karrierën ushtarake ka shërbyer në detyra të ndryshme drejtuese.