Filiz Mustafa drejt Kuvendit të Kosovës, Dragashi pritet të ketë deputetin e tij.

Filiz Mustafa, nga Komuna jonë , është shumë pranë Kuvendit të Kosovës, pasi emri i tij figuron në mesin e kandidatëve që pritet të marrin mandat deputeti në Kuvendin e Republikës së Kosovës, pas formimit të Qeverisë së re të udhëhequr nga Albin Kurti.

Kuvendi i Kosovës votoi Qeverinë e re me 62 vota për, 8 kundër dhe asnjë abstenim. Pas votimit, 15 deputetë nga radhët e Lëvizjes Vetëvendosje, të cilët janë pjesë e kabinetit qeveritar, pritet të heqin dorë nga mandatet e tyre parlamentare, duke i hapur rrugë kandidatëve të tjerë nga lista e LVV-së.

Në mesin e emrave që pritet të marrin mandat është edhe Filiz Mustafa, i cili në zgjedhjet e fundit parlamentare siguroi 13 mijë e 791 vota.

Rezultati i tij përbën një sukses të rëndësishëm, veçanërisht për Komunën e Dragashit, nga e cila Mustafa ka marrë një mbështetje të gjerë, ndërsa votat e tij janë shtrirë edhe në komuna të tjera të Kosovës dhe nga Diaspora.

Nëse mandati i tij konfirmohet, Filiz Mustafa do të bëhet deputeti i parë që garon nga Komuna e Dragashit dhe nga radhët e subjekteve politike të komunitetit shumicë, që arrin të sigurojë mandat në Kuvendin e Kosovës përmes sistemit aktual zgjedhor, ku Kosova përbën një zonë të vetme zgjedhore.

Dragashi ka pasur përfaqësim edhe më herët në Kuvendin e Kosovës. Në legjislaturën 2004–2007, komunën e përfaqësoi Shaban Halimi, ndërsa më vonë, në legjislaturën 2014–2017, deputet ishte edhe Hatim Baxhaku, i cili ishte kandidat nga dega e LDK-së në Prizren. Rasti i Filiz Mustafës do të shënonte një tjetër moment të rëndësishëm për Dragashin, pasi kandidatura e tij vjen përmes sistemit aktual zgjedhor dhe nga Komuna e Dragashit.

Për Dragashin, një përfaqësim i tillë në institucionin më të lartë legjislativ të vendit do të përbënte një zhvillim të rëndësishëm politik. Për Mustafën, ndërkaq, marrja e mandatit do të ishte kulmimi i një rezultati të fuqishëm zgjedhor, të ndërtuar mbi mbështetjen e mijëra qytetarëve.

Me 13 mijë e 791 vota, Filiz Mustafa ka arritur një rezultat që e ka pozicionuar në prag të Kuvendit të Kosovës, duke e vendosur emrin e tij në mesin e përfaqësuesve të ardhshëm parlamentarë.

Nëse mandati konfirmohet, Dragashi do të ketë përsëri zërin e tij në Kuvendin e Republikës së Kosovës, ndërsa Filiz Mustafa do të marrë përgjegjësinë për të përfaqësuar qytetarët që i dhanë mbështetjen e tyre në zgjedhjet e fundit.

13 mijë e 791 vota – një rezultat që mund ta çojë Filiz Mustafën nga Dragashi në Kuvendin e Republikës së Kosovës.

©TVOPOJA