Të rinjtë e Dragashit në dialog me institucionet lokale.

Në një përpjekje për të forcuar rolin e rinisë në shoqëri dhe në proceset e rëndësishme vendimmarrëse, të rinjtë e Komunës së Dragashit kanë zhvilluar një takim avokues me Drejtorinë për Kulturë, Rini dhe Sport. Në këtë takim, ata zhvilluan një bashkëbisedim të hapur dhe konstruktiv me drejtoreshën e këtij dikasteri, znj. Liridona Misinaj.

Gjatë tryezës së diskutimit, përfaqësuesit e rinj patën mundësinë të shpalosin një sërë rekomandimesh konkrete dhe të ngrisin shqetësimet e tyre për sfidat me të cilat përballen. Ata ofruan perspektivën e tyre të qartë lidhur me nevojat jetike të komunitetit rinor, si dhe theksuan domosdoshmërinë e përmirësimit dhe thellimit të raporteve me institucionet publike lokale.

Ky organizim vlerësohet si një hap tejet i rëndësishëm dhe thelbësor drejt fuqizimit të dialogut mes rinisë dhe pushtetit lokal. Qëllimi i nismave të tilla është që zëri i të rinjve jo vetëm të dëgjohet, por të kthehet në një element aktiv në hartimin e politikave dhe strategjive që prekin drejtpërdrejt të ardhmen e tyre.

Në përmbyllje të takimit, të rinjtë pjesëmarrës shprehën mirënjohjen e tyre për Drejtoreshën për Kulturë, Rini dhe Sport, znj. Liridona Misinaj, duke e falënderuar atë për pritjen e ngrohtë, bashkëbisedimin e sinqertë dhe gatishmërinë e treguar për të mbështetur vizionin e rinisë së Dragashit.

Vlen të theksohet se ky aktivitet i rëndësishëm avokues u bë i mundur falë realizimit dhe angazhimit të Organizatës Joqeveritare (OJQ) “AVOKO”, si dhe u mbështet nga “European Fund for the Balkans” (Fondi Evropian për Ballkanin), në kuadër të përpjekjeve të përbashkëta për të nxitur aktivizmin qytetar dhe demokratizimin e institucioneve.

©TVOPOJA