Almir Abdurramani, mësuesi që u bë udhëheqës vizionar në arsimin profesional

Almir Abdurramani, i lindur më 30 janar 1982 në Kuklibeg, është një nga emrat më të njohur në fushën e arsimit profesional dhe teknologjisë ushqimore në Kosovë.

Pas përfundimit të shkollës fillore në SHFMU “28 Nëntori” në vendlindje dhe të mesmes në Gjimnazin “Ruzhdi Berisha” në Dragash, Almiri zgjodhi të ndjekë pasionin e tij për shkencën dhe ushqimin, duke u diplomuar në Teknologji Ushqimore në Tiranë në vitin 2006. Që nga ajo kohë, jeta e tij profesionale është lidhur ngushtë me Shkollën e Mesme të Agrobiznesit dhe Teknologjisë “Abdyl Frashëri” në Prishtinë, ku filloi punën si mësimdhënës i lëndëve profesionale dhe ku, falë përkushtimit të tij të palodhur, u ngjit në pozita drejtuese.

Më 10 tetor 2025, ai u emërua ushtrues detyre (u.d.) drejtor i shkollës, duke marrë drejtimin e një institucioni me rëndësi të veçantë për arsimin profesional në vend. Në ndërkohë, Almiri vazhdoi edhe rrugën akademike, përfundoi studimet master në vitin 2011 dhe është në fazën përfundimtare të doktoraturës në fushën e Teknologjisë Ushqimore dhe Nutricionit në Kroaci.

Ai ka botuar disa punime shkencore ndërkombëtare, që reflektojnë përkushtimin e tij ndaj kërkimit dhe inovacionit. Gjatë më shumë se 19 viteve në SHMAT “Abdyl Frashëri”, Almir Abdurramani ka qenë një shtyllë kyçe e zhvillimit të shkollës dhe i gjithë sistemit të arsimit profesional në Kosovë. Ai ka shërbyer si anëtar i Këshillit drejtues të shkollës, kryetar i aktivitetit profesional të Teknologjisë Ushqimore, kryetar i Shoqatës Sindikale, si dhe koordinator i zhvillimit të standardeve profesionale në fushën e teknologjisë ushqimore që nga viti 2011.

Falë angazhimit të tij, shkolla “Abdyl Frashëri” ka arritur të modernizojë laboratorët, fermën mësimore dhe kurrikulat profesionale, duke u shndërruar në një qendër shembull për arsimin profesional në Kosovë. Ai ka qenë hartues i kurrikulave për MASHT dhe projektet ALLED, si dhe ekspert i akreditimit dhe validimit të institucioneve në Autoritetin Kombëtar të Kualifikimeve për një dekadë (2015–2025).

Nën koordinimin e tij, shkolla ka realizuar një sërë projektesh të rëndësishme zhvillimore me partnerë ndërkombëtarë si: Swisscontact, ALLED 1 & 2, RYCO – Break the Ice, RYCO Super Schools, si dhe Këshillin e Europës me projektin “Inclusive Education”.

Falë këtyre bashkëpunimeve, shkolla ka fituar pajisje moderne, infrastrukturë bashkëkohore dhe reputacion të respektuar në nivel kombëtar e rajonal. Ai ka shërbyer gjithashtu si urë lidhëse në binjakëzimin e shkollës “Abdyl Frashëri” me shkolla në Iowa (SHBA) dhe Novi Pazar (Serbi).

Përveç arsimit, Almir Abdurramani ka dhënë kontribut të rëndësishëm edhe në sektorin privat, si konsulent dhe ekspert i jashtëm në industrinë ushqimore në Kosovë. Ai ka bashkëpunuar me shumë biznese prodhuese e përpunuese, duke ofruar ekspertizë në zbatimin e standardeve të sigurisë ushqimore dhe ngritjen e cilësisë së prodhimit vendor.

Puna e tij e pandërprerë, përkushtimi ndaj dijes dhe lidershipi i qetë e vizionar e kanë bërë Almir Abdurramanin një shembull të rrallë të suksesit në arsimin profesional. Nga një mësues i ri i apasionuar pas teknologjisë ushqimore, ai është shndërruar në drejtues të respektuar dhe mentor për shumë të rinj, duke dëshmuar se suksesi ndërtohet me punë, përkushtim dhe dashuri për profesionin.

©TVOPOJA