OPOJANI FISNIK SINANI, DOKTORI MË I RI I SHKENCAVE

Më 6 korrik 2026, në Fakultetin e Mjekësisë të Universitetit “SS. Cyril and Methodius” në Maqedoninë e Veriut, dr. Fisnik Sinani mbrojti me sukses të lartë disertacionin e doktoratës me titull: “Ndikimi i infeksioneve cerviko-vaginale në lindjen e parakohshme”, duke fituar gradën Doktor i Shkencave të Mjekësisë.

Mentore e doktoratës ishte prof. dr. Jadranka Georgievska, ndërsa komisioni u kryesua nga prof. dr. Ana Daneva Markova. Anëtarë të komisionit ishin prof. dr. Goran Dimitrov, prof. dr. Vesna Livrinova dhe prof. dr. Ivo Kaev nga Universiteti i Mjekësisë në Shkup. Mbrojtja e disertacionit ishte publike.

Dr. Fisnik Sinani u lind më 22 mars në fshatin Zgatar të komunës së Sharrit. Shkollën fillore e kreu në vendlindje, ndërsa gjimnazin në “Ruzhdi Berisha” në Sharr.

Në vitin akademik 2008/2009 regjistroi studimet në Fakultetin e Mjekësisë të Universitetit të Prishtinës, në drejtimin Mjekësi e Përgjithshme, të cilat i përfundoi në tetor të vitit 2014 me sukses të shkëlqyer.

Nga qershori i vitit 2015 deri në vitin 2019 punoi si mjek i përgjithshëm në Qendrën Kryesore të Mjekësisë Familjare në Prizren. Specializimin në fushën e Gjinekologjisë dhe Obstetrikës e përfundoi në korrik të vitit 2022. Pikërisht gjatë periudhës së specializimit ai regjistroi edhe studimet e doktoratës në Universitetin “SS. Cyril and Methodius”.

Në dhjetor të vitit 2022 u punësua si mjek specialist në Spitalin Rajonal “Prim. Dr. Daut Mustafa” në Prizren, ku vazhdon të japë kontributin e tij profesional si një gjinekolog-obstetër i përkushtuar. Gjatë tre viteve të punës si klinicist në këtë spital ka realizuar me sukses një numër të madh lindjesh dhe ndërhyrjesh operative. Njëkohësisht ushtron veprimtarinë edhe në ordinancën e tij private në Prizren.

Në periudhën 2019–2022, tri herë radhazi, ka qenë delegat në Odën e Mjekëve të Kosovës.

Dr. Fisniku është anëtar i Shoqatës së Gjinekologëve dhe Obstetërve të Kosovës. Është autor dhe bashkautor i disa punimeve shkencore, ndërsa ka marrë pjesë në shumë simpoziume, konferenca dhe kongrese shkencore brenda dhe jashtë vendit.

Në jetën familjare, ai është i martuar me Hava Ibrahimi Sinani nga fshati Bresanë dhe është baba i tre fëmijëve trenjakë shtatëvjeçarë – një djali dhe dy vajzave. Jeton dhe vepron në Prizren.

Pas mbrojtjes së doktoratës, në një njoftim të publikuar në profilin e tij në Facebook, dr. Fisnik Sinani, ndër të tjera, shkroi:

“Sot mbylla me krenari një nga kapitujt më të rëndësishëm të rrugëtimit tim akademik, duke përfunduar me sukses studimet e doktoratës. Ky ka qenë një udhëtim i mbushur me sfida, përkushtim, kërkim shkencor të pandërprerë dhe mësime të vyera. Çdo hap i këtij rrugëtimi më ka formësuar si studiues dhe profesionist, duke më bindur edhe më shumë se dija është një proces i vazhdueshëm i zhvillimit dhe përmirësimit.

Mirënjohja ime shkon për familjen, miqtë, kolegët dhe mentorët, të cilët me mbështetjen, besimin dhe inkurajimin e tyre kanë qenë pjesë e pandashme e këtij suksesi. Çdo arritje është rezultat i punës së palodhur, këmbënguljes dhe besimit në qëllimet që i vendosim vetes.

Përfundimi i studimeve të doktoratës nuk shënon fundin e rrugëtimit tim akademik, por hap një kapitull të ri me sfida, përgjegjësi dhe mundësi të reja për të kontribuar në kërkimin shkencor, inovacion dhe zhvillimin e dijes. Me përulësi dhe vendosmëri vazhdoj përpara, i motivuar për të mësuar, për të krijuar dhe për të dhënë kontributin tim në shërbim të shkencës dhe shoqërisë. Faleminderit të gjithëve që ishit pjesë e këtij rrugëtimi!”

Në një bisedë me ne, dr. Fisnik Sinani u shpreh se këtë arritje të madhe shkencore ia dedikon babait të tij, dr. Rafet Sinani, gjinekolog-obstetër me reputacion, i cili për dekada të tëra ka qenë në shërbim të pacientëve të rajonit të Prizrenit. Me shumë sakrifica e punë të pandërprerë, ai arriti të edukojë dhe të shkollojë katër fëmijët e tij – tre djem dhe një vajzë – duke u krijuar atyre dhe familjes një jetë të mirë e të begatë. Ky dedikim është një dëshmi e respektit dhe mirënjohjes së birit për prindin që me mund e përkushtim i hapi rrugën drejt dijes.

Suksesi i dr. Fisnik Sinanit është një krenari jo vetëm për familjen e tij, por edhe për Zgatarin, Opojën, Prizrenin dhe mbarë hapësirën shqiptare. Ai dëshmon se përkushtimi, puna dhe besimi në dije janë rruga më e sigurt drejt arritjeve të mëdha.

Urime, dr. Fisnik, për këtë avancim të rëndësishëm shkencor! Uroj që kjo të jetë vetëm një stacion në rrugën e gjatë të sukseseve tuaja dhe që arritjet t’ju radhiten njëra pas tjetrës si rruazat në një gjerdan, në shërbim të shkencës, mjekësisë dhe njerëzimit. (Demir Reshiti)