KKSB Dragash kundërshton mbajtjen e manifestimit “AROG FEST” në datën e propozuar

Dragash, 26 prill 2025 – Këshilli Komunal për Siguri në Bashkësi (KKSB) në Dragash, në mbledhjen e dytë të rregullt për këtë vit, ka diskutuar në mënyrë të veçantë paralajmërimin për mbajtjen e manifestimit “AROG FEST” në këtë komunë.

Sipas informatave që mediumi ynë ka siguruar, anëtarët e KKSB-së, duke u bazuar në diskutimet e zhvilluara dhe analizën e rrethanave aktuale, kanë vlerësuar se mbajtja e këtij eventi në datën e propozuar paraqet disa shqetësime serioze.

Në arsyetimin e tyre, KKSB theksoi se:

Manifestimi “AROG FEST” nuk përfaqëson vlerat dhe traditat kulturore të komunitetit lokal të Dragashit;

Organizimi i tij ngjall shqetësime të bazuara në përvoja të mëparshme të keqpërdorimit të aktiviteteve për qëllime politike dhe propagandistike;

Data e propozuar për mbajtjen e festivalit përkon me Ditën e Dëshmorëve, një datë me ndjeshmëri të veçantë kombëtare dhe historike për qytetarët e Dragashit dhe të mbarë Kosovës;

Ky manifestim mund të cenojë harmoninë ndëretnike dhe stabilitetin social në komunë;

Qëllimi i festivalit, sipas vlerësimit të KKSB-së, është më tepër profitabil sesa promovues i vlerave kulturore lokale.

Për të gjitha këto arsye, KKSB i ka bërë thirrje organizatorëve të “AROG FEST” që të rishikojnë formatin dhe datën e mbajtjes së manifestimit, duke respektuar ndjeshmërinë historike dhe kulturore të komunitetit të Dragashit. Po ashtu, ata janë ftuar të bashkëpunojnë me institucionet lokale për organizimin e aktiviteteve që reflektojnë dhe nderojnë vlerat autentike të këtij komuniteti.

Mediumi ynë do të vazhdojë të përcjellë zhvillimet lidhur me këtë çështje.