SHA SHARRI fuqizon komunitetin përmes traditës dhe bashkëpunimit

Shoqata e Afaristëve SHARRI vijon të jetë shembull i përkushtimit ndaj komunitetit, duke organizuar iftarin tradicional që shënoi një tjetër ngjarje të suksesshme dhe gjithëpërfshirëse. Aktiviteti grumbulloi në një atmosferë të ngrohtë e festive afaristët e zonës, instancat më të larta komunale, përfaqësues të Bashkësisë Islame dhe shumë të tjerë nga sektori institucional, publik dhe privat, duke dëshmuar bashkëpunimin e ngushtë mes të gjithëve, transmeton Televizioni Opoja.

Një nga momentet më të spikatura të mbrëmjes ishte ndarja e mirënjohjes për Kryetarin e Komunës, z. Bexhet Xheladini, për mbështetjen e tij të vazhdueshme ndaj SHA SHARRI. Në mungesë të tij, mirënjohjen e pranoi Nënkryetari i Komunës, z. Resul Fetahu, duke përfaqësuar me dinjitet mbështetjen e ofruar për shoqatën dhe për iniciativat e saj.

Në veçanti, Kryetari Xheladini u vlerësua për ndihmën e tij në organizimin e panairit tashmë të njohur Expo Sharri, i cili promovon produktet vendore dhe bashkon afaristët dhe bujqit lokalë në një platformë të rëndësishme ekonomike dhe kulturore.

“Falë ndihmës dhe bashkëpunimit të Kryetarit Xheladini, kemi arritur ta forcojmë rolin e SHA SHARRI si një platformë që promovon vlerat tona dhe mbështet zhvillimin ekonomik vendor,” tha Burim Piraj, kryetari i shoqatës gjatë ngjarjes.

Ky iftar tradicional nuk është vetëm një ngjarje simbolike, por edhe një reflektim i vlerave të solidaritetit dhe përkushtimit për zhvillimin e komunitetit. Panairi Expo Sharri mbetet një dëshmi e fortë e rëndësisë së mbështetjes lokale dhe një frymëzim për bashkëpunim të mëtejshëm.

©TVOPOJA