Kuvendi Komunal i Dragashit mban mbledhjen e pestë të rregullt më 2 qershor 2025

Me vendim të kryesueses së Kuvendit Komunal të Dragashit, znj. Arjeta Skeraj, është caktuar mbajtja e mbledhjes së pestë të rregullt për vitin 2025. Seanca do të mbahet më 02 qershor 2025, duke filluar nga ora 10:00, në sallën e Kuvendit Komunal të Dragashit.

Në rend dite janë përfshirë këto pika kyçe:

1. Miratimi i procesverbalit nga mbledhja e kaluar, në kuadër të vazhdimësisë ligjore dhe procedurale të punës së Kuvendit.

2. Propozim-Vendim për miratimin e nismës për bashkëpunim ndërkombëtar komunal, për fillimin e procedurave për binjakëzim ndërmjet Komunës së Dragashit dhe Komunës Purkersdorf – Austri.

3. Propozim-Vendim për miratimin e nismës për bashkëpunim ndërkombëtar komunal edhe me Komunën e Mavrovës – Rostushës në Maqedoninë e Veriut, me synim zgjerimin e marrëdhënieve rajonale dhe forcimin e lidhjeve institucionale.

4. Propozim-Vendim për anulimin e vendimit për publikimin e listave të pronave të paluajtshme të Komunës së Dragashit, sipas dokumentit zyrtar të referencuar (Lista e Përgjithshme dhe e Veçantë – 01Nr.060/01-5357-3/25, dt. 08.04.2025).

5. Të ndryshme (Eventuale) – diskutime dhe propozime të tjera jashtë rendit të caktuar të ditës.

Kjo mbledhje paraqet rëndësi të veçantë për të ardhmen e bashkëpunimeve ndërkombëtare të Komunës së Dragashit, si dhe për menaxhimin transparent të pronës komunale. Televizioni Opoja do të raportojë për zhvillimet e kësaj seance dhe vendimet që do të merren nga përfaqësuesit e zgjedhur të qytetarëve.