Ku të regjistroheni në klasën e dhjetë dhe pse pikërisht në “Ruzhdi Berisha” në Dragash?

Shkolla e Mesme e Lartë “Ruzhdi Berisha” në Dragash ka zhvilluar sot një vizitë informuese në dy shkolla fillore të komunës, me qëllim prezantimin e drejtimeve të saj arsimore për vitin e ri shkollor. Vizita u zhvillua në Shkollën Fillore “Ilmi Batjari” në Blaç dhe në “28 Nëntori” në Bresanë.

Ekipi prezantues i shkollës, i përbërë nga ushtruesi i detyrës së drejtorit Lulzim Ahmeti, mësimdhënësi Fadil Halimi si dhe tre nxënës të shkollës  – informuan nxënësit e klasave të nënta për mundësitë që ofron kjo shkollë e mesme.

Në këtë prezantim u shpalosën të gjitha drejtimet mësimore që ShML “Ruzhdi Berisha” ofron:

1. Gjimnaz – Shkenca natyrore

2. Gjimnaz – Shkenca shoqërore-gjuhësore

3. Juridik – Administratë dhe shërbime në zyrë

4. Ekonomi – Banka dhe sigurime

5. Shëndetësi – Bashkëpunëtor profesional i infermierisë

6. Shëndetësi – Teknik i farmacisë

7. Teknologji e Informacionit – Teknik i sistemeve të TIK-ut

Gjatë prezantimit, nxënësit u njoftuan edhe për avantazhet e shumta që ofron kjo shkollë për nxënësit e saj, si:

• Transport falas i siguruar nga Komuna e Dragashit,

• Mbështetje financiare për organizimin e mbrëmjes së maturës,

• Siguri brenda dhe jashtë objektit shkollor,

• Staf arsimor profesional dhe i përkushtuar,

• Pjesëmarrje të rregullt në gara shkollore dhe olimpiada,

• Sallë sportive funksionale dhe ambiente të pajisura për mësimdhënie moderne,

• Klasa me pajisje didaktike bashkëkohore dhe qasje në internet,

• Kabinete profesionale për drejtimet teknike dhe shëndetësore,

• Përgatitje intensive për provimet e maturës shtetërore.

Në fund të takimeve, nxënësve iu shpërndanë edhe fletushka informuese për drejtimet që u prezantuan, duke u dhënë mundësinë të reflektojnë më lehtësisht për zgjedhjen e tyre të ardhshme akademike.

Vizita u mirëprit me interesim të madh nga nxënësit dhe stafi arsimor i shkollave pritëse, duke e konsideruar këtë nismë si një mundësi të rëndësishme për informim dhe orientim të drejtë të gjeneratës së re drejt një arsimi cilësor dhe të përshtatur me tregun e punës.