Kosova drejt debutimit ndërkombëtar në Socca, publikohet lista për ndeshjen e parë miqësore

Pas pranimit zyrtar në Federatën Ndërkombëtare të Socca-s, Kosova ka nisur menjëherë hapat konkret për organizimin dhe zhvillimin e këtij sporti në vend. Ky sukses është arritur falë angazhimit të madh të Arben Dautit, së bashku me Skender Kaprën dhe bashkëpunëtorët e tyre, të cilët kanë realizuar një punë të rëndësishme për përfaqësimin dhe anëtarësimin ndërkombëtar të Socca Kosovës.

Menjëherë pas pranimit, ka filluar procesi i regjistrimit të skuadrave, ndërsa shumë shpejt pritet të nisë edhe Liga Shtetërore e Kosovës në Socca. Po ashtu, është konfirmuar se Kosova do të marrë pjesë në Kampionatin Evropian të Socca-s, i cili do të mbahet në Shqipëri, duke shënuar kështu paraqitjen e parë zyrtare të vendit në një garë ndërkombëtare të këtij niveli.

Ndërkohë, është formuar edhe Kombëtarja e Kosovës në Socca, ndërsa është publikuar lista e lojtarëve që do ta përfaqësojnë vendin në ndeshjen e parë miqësore.

Lista e lojtarëve:

• Raqip Salihu
• Hazer Azizi
• Narcis Alibegu
• Bilall Sherifi
• Kemajl Gashi
• Ismail Rexhepi
• Mark Milicaj
• Mentor Mejzini (Kapiten)
• Albert Muharremaj
• Burim Hajdaraj
• Emir Baftiu
• Muhamed Berisha

Ndeshjen e parë, Kombëtarja e Kosovës do ta zhvillojë më 1 mars 2026, nga ora 20:00, në “Shtëpinë e Futbollit” në Tiranë, në një miqësore vëllazërore kundër Shqipërisë.

Një nga figurat kryesore të kësaj përfaqësueseje është Mentor Mejzini, i cili është emëruar kapiten i skuadrës. Ish-lojtari profesionist i futsallit në Kosovë dhe Shqipëri, si dhe ish-reprezentues i Shqipërisë në gara ndërkombëtare, vjen nga fshati Kosavë i komunës së Dragashit, duke përfaqësuar me krenari komunën tonë në këtë projekt historik.

Kjo ndeshje historike do të jetë e qasshme për të gjithë sportdashësit, pasi përballja miqësore Shqipëri – Kosovë në Socca do të transmetohet drejtpërdrejt në TV Opoja.

©TVOPOJA