Mustafa: Kompensimi i Dëmeve nga Vërshimet i Sigurt: Raporti Komunal Shkaktoi Vonesa

Së pari, mund të konstatojmë që kryetari Xheladini, sipas mendimit tim, mban shtafetën për destruktivitetin e tij si kryetar komune në raport me qeverinë qëndrore, në kohën e së cilës komuna që ai drejton, ka përfituar investime që tejkalojnë vlerën prej 10 milionë euro, gjë e cila nuk barazohet as me 20 vitet e kaluara të qeverisjeve pararendëse qëndrore. Pra, Qeveria Kurti, ka investuar në komunën e Sharrit për katër vite, sa kanë investuar bashkarisht të gjitha qeveritë e mëhershme për 20 vite.

Së dyti, kryetari Xheladini, tash kur kanë kaluar më tepër se një vit nga dy aksionet e jashtëzakonshme të qeverisë së Republikës dhe institucioneve të saja për mbylljen e komunës paralele të Serbisë në fshatin Vranic dhe mbylljes së filialit të bankës ilegale serbe në komunën tonë, ende nuk e ka thënë asnjë fjalë të vetme në përkrahje të këtyre aksioneve. Për më tepër, shumë nga personat e infiltruar në funksionimin e këtyre institucioneve, kanë bërë strehë në komunë, duke u punësuar me procedura të dyshimta rekrutimi pra me ndikime nga akterë komunalë, sigurisht vartës së kryetarit Xheladini.

Së treti, kryetari Xheladini, bashkë me komisionin e përbërë për çështjen për të cilën ai po zhurmon poshtë e lartë, atë të kompenzimit të dëmeve nga vërshimet, kanë bërë një sërë shkeljesh përgjatë fazës kryesore të këtij procesi, asaj të verifikimit të dëmeve të shkaktuara nga gjendja faktike e terenit. Duke dashur që edhe këtë fatkeqësi natyrore ta shfrytëzojnë elektoralisht, Xheladini dhe LDK në Sharr, bashkë me akterë përcjellës, kanë bërë fushatë në emër të këtij procesi duke e kthyer monedhën nga ju ka konvenuar. Kur rriteshin vlerat e shkruheshin gjëra joreale të dëmeve të ekonomive familjare, vartës së tij të strukturave partiake në fshatra, krekoseshin se do ju kompenzohen më shumë se vlera e dëmit, sepse jemi ne në pushtet (pra, LDK). E tash kur raportit të komisionit komunal përveç votimit në Kuvend Komunal po i duhet edhe verifikimi final nga Agjencioni për Menaxhimin e Emergjencave dhe kur po nxjeren në pah e po adresohen tentimet për keqpërdorime të këtij procesi, kryetari e vartësit e tij, po zhurmojnë studiove televizive e kudo ku po kanë hapësirë, duke drejtuar gishtin kah qeveria e duke thënë që faji është tek niveli qëndror.

Si qendër e Lëvizjes VETËVENDOSJE! në Sharr kemi adresuar në vazhdimësi e kemi ndjekur në përpikmëri këtë proces që padyshim që është mëse i rëndësishëm për të gjithë qytetarët tanë të cilët kanë pësuar dëme (fatmirësisht vetëm materiale) përgjatë vërshimeve të ndodhur në komunën tonë. Njëjtë dhe vazhdojmë të bëjmë edhe sot e kësaj dite, ku komunikimin me institucionet përkatëse e kemi të vazhdueshëm në kuptimin e adresimit të kësaj çështjeje.

Proceduralisht të gjitha vonesat për ekzekutim të mjeteve janë të shkaktuara nga raporti jo i duhur i përpiluar nga komisioni komunal, si dhe koha e nevojshme për verifikim.

Dëmet për të gjithë qytetarët që meritojnë vlerën reale të kompenzimeve do të bëhen. Që të gjitha, një nga një. Deri atëherë i lëmë kohë doktorit Xheladini, njëherazi kryetarit në pension, për zhurmë në rrjete sociale e në emisione televizive.