16 vjeçari nga komuniteti Goran, Elvaris Shuplja, i lindur në fshatin Restelicë të Dragashit, ka pranuar ta vesh fanellën e Kombëtarës së Kosovës në Futboll, raporton TV Opoja.
Futbollisti i cili është pjesë e skuadrës italiane, Sasuolo, do të jetë pjesë e kombëtarës së Kosovës U-17, në dy ndeshjet miqësore me kombëtaren e Shqipërisë, të cilat do të luhen me 21 dhe 23 qershor në ora 17:30, në stadiumin Kukës Arena në Shqipëri.
Ai është futbollisti i parë në histori nga komuniteti goran i cili do ta vesh fanellën e Kosovës.
Shuplja gjatë ditës së sotme është pritur nga kryetari i Dragashit, Bexhet Xheladini, në zyren e komunës.
Kryetari Xheladini u shpreh i lumtur për vetë faktin se ky djalosh vjen nga komuna jonë duke e falënderuar dhe inkurajuar që të punojë edhe më shumë drejt arritjes së sukseseve të reja në të ardhmen./Opoja.tv